جب آنکھ میں کچھ خاک سی اُڑتی نظر آئی

جب آنکھ میں کچھ خاک سی اُڑتی نظر آئی سمجھے سبھی خوش فہم کہ حدِ سفر آئی

اِک عُمر تو جاگے تھے کہ چھٹ جائے اندھیرا پَل بھر کو لگئ آنکھ تو ملنے سحر آئی

میں نے تو ورق پر ابھی لکھنا تھے کئی نام دُھندلی سی یہ تصویر کہاں سے اُبھر آئی؟

دل میں ہے عجب ساعتِ نو روز کا عالم بُھولی ہوئی اِک یاد سرِ شام گھر آئی؟

شاید اِسے کہتے ہیں تمنا کی تلافی ! ہونٹوں پہ تبسم تھا کہ پھر آنکھ بھر آئی؟

پلکوں پہ نہ آنسو نہ ستارے نہ چراغاں تو آج شبِ ہجر میری جاں کدھر آئی؟

اُس نے بھی کیا راہ بدلنے کا ارادہ صد شکر محبت بھی کسی موڑ پر آئی

اِک راحتِ اعزاز سجی تیری جَبیں پر اِک تہمتِ پیہم تھی کہ محسنؔ کے سَر آئی

محسنؔ نقوی